Xornada de xogos tradicionais galegos que son parte do noso patrimonio lúdico e que están en desuso, como a billarda, o lanzamento de boina, a bugalliña…, que rematan nun concerto dunha hora, de 19 a 20 h, onde se mesturarán pezas de Xabier Vizcaíno con músicas tradicionais galegas para facer partícipe ao público destinatario: familias con crianzas recomendado de 2 ata 12 anos.
Haberá vídeos explicativos coas normas e un pouco de historia de cada xogo para refrescar a memoria de quen xa os coñece e tamén para quen os vai practicar por primeira vez.
Os pais, nais ou familias participantes serán o fío condutor para que os nenos e nenas aprendan o vocabulario dos xogos así como as súas normas. Incentivarase as familias para que compartan nas súas redes sociais todo o referente aos xogos e a música ou o que consideren, sempre e cando non sexa discriminatorio nin ofensivo.
Todo o proxecto quedará plasmado nun vídeo/documental de cinco minutos onde se buscarán as impresións das persoas participantes así como imaxes dun día en familia xogando e cantando en galego.