Festa do Apego en Ames

O Pazo da Peregrina e mais o auditorio da Casa da Cultura de Bertamiráns acollerán a I Festa do Apego do Concello de Ames. As actividades comezarán o venres, 11 de setembro, ás 17.00 horas, no Pazo da Peregrina, co obradoiro de cantos de berce O son que me arrola, da Asociación Antonio Gandoy. Esta actividade está dirixida a nenos e nenas de 0 a 3 anos.

As actividades do venres continúan ás 19.00 horas no auditorio da Casa da Cultura de Bertamiráns coa obra de teatro Ris Ras, da compañía Baobab Teatro. Trátase dunha viaxe musical a través de xogos, enredos e outras historias, que está dirixida a nenos e nenas de 0 a 8 anos.

O sábado, 12 de setembro, as actividades comezarán ás 11.00 horas no Pazo da Peregrina coa compañía teatral Tropa de Trapo. Esta compañía porá en escena o espectáculo Barquiño de Pau, que está dirixido a crianzas de 0 a 6 anos. Trátase dunha actividade de teatro de obxectos e música para explorar os sentidos e as emocións.

A continuación, ás 12.00 horas, tamén no Pazo da Peregrina, haberá unha sesión de narración oral denominada Contos, lerias e cousas pequenas, a cargo de Vero Rilo, para nenos e nenas a partir dos 3 anos. Ás 13.00 horas chega Pakolas ao Pazo da Peregrina para ofrecer un divertido concerto con cancións para rockear, soñar, aprender e non parar de bailar.

Pola tarde, haberá dúas actividades no Pazo da Peregrina: ás 17.00 horas impartirase a sesión de contos Carvalho Calero no Carreiro, a cargo de Vero Rilo e Sonsoles Penadique. Nesta actividade compartiremos contos e cantos da tradición oral galega e portuguesa, que están dirixidos a un público familiar. Ademais, ás 18.30 horas haberá unha Foliada con Apego dinamizada por Silvia Cerneira da Banda da Balbina.

Por outra banda, no auditorio da Casa da Cultura de Bertamiráns, ás 20.30 horas, Magín Blanco e a Banda das Apertas ofrecerán un concerto de música infantil para cantar e bailar en familia.

Actividades permanentes

Ao longo de todo o día haberá dúas actividades que estarán de xeito permanente, en horario de 10.00 a 20.00 horas, no Pazo da Peregrina. Unha delas será o Espazo Apego, con información sobre o programa Apego e os recursos que a pon a dispor das familias. A outra actividade permanente será o Espazo recursos, no que haberá unha ampla mostra de recursos para facilitar a crianza en galego (contos, música, xogos…) e asesoramento a cargo de Fabaloba.

Os impresos de inscrición poden descargarse na seguinte ligazón ↓

Folla de inscrición Festa do Apego en Ames

Setembro-outubro con Apego en Santiago

Despois das vacacións do verán o Espazo Apego volve abrir as súas portas para acoller nunha contorna segura as actividades que nos achegan á raíz, ao amor ao propio, á lingua... Vides?

Tardes de contos (para crianzas de 0 a 3 anos). Todos os martes de 17 a 18.30 h (o acceso ao espazo comezará a partir das 16.40 h). Contos lidos, contos musicais, avoas que contan, visitas de autores, construción de poemas, dramatizacións… un tempo no que achegarse á literatura oral e escrita!

A familia vai á escoliña! (para nais, pais ou persoas encargadas da crianza ata os 6 anos). Todos os mércores ás 17.30 h. Charlas e obradoiros prácticos sobre diferentes aspectos da crianza:

• 2 de setembro. Construíndo minimundos (familias con crianzas de 4 a 8 anos). Obradoiro e espazo de xogo para gozar e reflexionar ao mesmo tempo sobre a importancia do xogo libre.
• 9 de setembro. Obradoiro de masaxe e xogo sensorial (familias que teñan un bebé de 0 a 8 meses ou que o estean agardando). Falarase dos beneficios da masaxe infantil a partir da práctica, da importancia do xogo e do movemento libre...
• 16 de setembro. Abrindo camiño: sexualidade infantil (para nais e pais con crianzas de 0 a 6 anos). Faladoiro onde compartir temas... Como falar de sexualidade? Que contar e cando? O paradoxo de "non facer educación sexual", erótica infantil vs. erótica adolescente…
• 23 de setembro. O apoio á lactación materna (para embarazadas ou nai lactantes). Faladoiro onde compartir experiencias e exemplos prácticos co asesoramento da asociación pro lactación materna Mámoa no seu 20 aniversario.
• 30 de setembro. A exploración libre para as crianzas (para familias con crianzas entre 8 meses e 5 anos). A familia poderá descubrir provocacións facilmente replicables ao tempo que reflexionar sobre como se desenvolve o xogo das súas crianzas.
• 7 de outubro. Xogo libre e material non estruturado (para familias con crianzas de 0 a 6 anos). O xogo libre proporciona grandes doses de autonomía e confianza nas crianzas.
• 14 de outubro. Ideas para medrar en igualdade (para familias con crianzas de 0 a 6 anos ou que agardan un bebé). Faladoiro en que se analizará a importancia da imaxe, da linguaxe, do xogo e dos xoguetes que poñemos á súa disposición... na importante tarefa de educar en valores.
• 21 de outubro. O programa Apego: información, recursos e actividades para criar en galego (para familias con crianzas de 0 a 6 anos ou que agardan un bebé). Preséntanse algunhas ferramentas e redes útiles para soster e arroupar a crianza en lingua galega.
• 28 de outubro. A vaca Paca cóntanos en que consiste a enfermidade celíaca (para familias con crianzas de 0 a 6 anos e que están agardando). A dieta libre de glute é o tratamento que hai que seguir pero... Que é o glute? Que alimentos o conteñen? Cales son estratexias para evitar a contaminación cruzada?

Enredando.  Espazo de entretemento activo en que se promove a socialización e a expresión verbal, xestual, corporal… manexando ditos, cancións, xogos, xoguetes...: 

• Os mércores , só para cubrir a conciliación da charla que se desenvolve de forma paralela no caso de que as persoas asistentes o precisaren para crianzas de 2 a 6 anos.
• Os xoves de 17 a 18.30, cando non hai función (semanas alternas) para nenas e nenos entre 3 e 6 anos.

Os xoves función! (para crianzas ata os 6 anos). Os xoves alternos ás 17.30 h. Representacións teatrais, musicais, contacontos, sensoriais... guiadas por artistas especializados.

• 3 de setembro. A estimulación musical temperá con Leticia Falcón (de 3 a 6 anos). Traballar a música, así como a lingua primeira, fomenta a aprendizaxe dun xeito natural e achégalles ás crianzas unha experiencia rica tanto no vocabulario da nosa lingua como na linguaxe sonora.
• 17 de setembro. Cantacontos para bebés con Pablo Díaz (de 0 a 4 anos). Viaxe a través dos contos coa música como fío condutor onde se tratan temas e rutinas adaptadas para as crianzas.
• 24 de setembro. Nano vai á escola con Raquel Queizás (de 0 a 4 anos). Os nanocontos relatan a vida da ra Nano. Desta volta tocaralle ir á escola, ese lugar tan diverso onde a seguridade de ter personalidade e lingua propia van ser un gran apoio!
• 1 de outubro. Contando números, cantando cores con Pablo Díaz (de 3 a 6 anos). Desta volta reflexionaremos sobre a igualdade de oportunidades entre nenos e nenas, entre maiores e pequenas, sobre a equidade e sobre o respecto ás persoas desde o comezo das nosas vidas.
• 15 de outubro. O xogo de Nano con Raquel Queizás (de 0 a 4 anos). Neste nanoconto, Nano recibirá unha visita moi especial o día do seu aniversario. Está todo preparado: a torta, as candeas, os globos...
• 29 de outubro. Brinca vai! con Paco Nogueiras (a partir de 3 anos). Música para encher un camiño con pasos grandes, pasos pequeniños, con carreiras de chimpos, con risas, con bailes, con notas...

Xogos de palabras (para crianzas de 3 a 6 anos). Os venres de 17 a 18.30 h. Xogar coa palabra falada e cantada para entreterse é un costume moi arraigado na crianza tradicional. Coñecer a contorna a través das palabras e aprender a relacionarse vén en parte dado por estes xogos.

Para poder cumprir as normas de distanciamento todas as actividades do Espazo Apego terán un límite reducido de asistentes e precisarán inscrición previa en dlg@santiagodecompostela.gal (nome completo, idade de cada unha das persoas asistentes e teléfono de contacto). O prazo de inscrición en cada actividade abrirá unha semana antes (ás 00 h do día correspondente da semana anterior).

Para poder seguir as normas de hixienización o acceso ao espazo comezará arredor de vinte minutos antes de cada actividade. Na sala de actividades entrarase sen calzado (aconséllase acudir con calcetíns grosos e roupa cómoda). Será obrigatorio o uso de máscara.

Outras actividades fóra do Espazo Apego pero que seguro que vos han gustar...

O sábado 12 de setembro haberá que andar polo parque de Bonaval para festexar que as cousas están mudando, que está para vir o outono, que logo recolleremos castañas... Ás 12 h chegará Pablísimo co seu “Paroleiro”, ás 17 h Teatro Ghazafellos coa súa “Máquina do tempo” e para rematar a xornada Mamá Cabra presentará “A fraga do meu avó” nunha programación da Rede de Dinamización Lingüística da Xunta de Galicia. Reserva de entradas en reservas.gal

E o domingo 25 de outubro os números de malabares, aéreos, o humor, o clown... van encher o Auditorio de Galicia na Gran Gala do Circo! As entradas en compostelacultura.gal

Máis información en delingua.santiagodecompostela.gal

Xullo e agosto de actividades en Compostela

É verán, mais non parece un verán coma os outros... As vacacións van ser un chisco diferentes este ano e iso incomódanos e inquiétanos, pero sabemos que todo vai pasar e vai abrirse diante nosa un mundo fermoso e novo.

Pontevedra retoma o programa Apego despois do confinamento

Antes da Covid a Concellaría de Normalización Lingüística do Concello de Pontevedra tiña en marcha unha nova quenda de actividades dentro do programa Apego. A meirande parte dos obradoiros quedaron pendentes, polo que foron reprogramados para os meses de xuño e xullo, tal e como presentamos no novo programa que podedes descargar aquí. Cómpre inscribirse ás actividades en apuntate.pontevedra.gal. As actividades están dirixidas a familias con nenas e nenos das idades indicadas en cada actividade: Camiñada polo Gafos; para familias con nenas/os de 0 a 6 anos Na procura das herbas de San Xoán, con Amancio Castro, membro de Vaipolorrío e profesor de ciencias naturais e educación ambiental Excursión pola contorna do río Gafos até o muíño de Cabanas para coñecer e identificar as especies naturais e atopar as herbas de San Xoán. — Domingo 21 de xuño, de 10 h a 12 h no albergue de Peregrinos Xogos na alameda; para familias con nenas/os de 0 a 6 anos Vai de xogos, con Risotadas Obradoiro na rúa para aprender e gozar dos xogos tradicionais, con e sen trebellos. — Venres 26 de xuño, entre as 17 h a as 19.30 h na alameda Obradoiro de arrolos; para familias con nenas/os de 0 a 2 anos Arrolos de Salitre, con Faia Díaz e Guillerme Fernández Neste obradoiro aprenderemos as melodías tradicionais coas que arrolar aos bebés, transmitíndolles apego, lingua e música. — Mércores 1 de xullo, primeira sesión de 17.30 h a 18.30 h nos xardíns do Doutor Marescot — Mércores 1 de xullo, segunda sesión de 19 h a 20 h nos xardíns do Doutor Marescot Obradoiro de cancións; para familias con nenas e nenos de 0 a 5 anos Fíos do Querer, con Cé Orquestra Pantasma Obradoiro para aprender cantigas, melodías e lingua a través dun espectáculo pensado para cantar, bailar e xogar en familia. — Xoves 9 de xullo, de 18.30 h a 19.15 h nos xardíns do Doutor Marescot Saída á natureza; de 0 a 6 anos; ata 20 familias Aprendendo a falar cos paxariños, con Ventos Saída pola Illa do Covo para observar a natureza e aprender sobre a nosa contorna natural. — Mércores 15 de xullo, de 18.30 h a 20.30 h na ponte peonil de tirantes sobre o río Lérez

Cartel desacargable para lembrar as normas de hixiene

Para poder seguir as novas normas de hixiene recomendadas contra a Covid-19 podedes descargar o cartel onde Po nos lembra que hai que lavar as mans, esbirrar contra o cóbado, pór a máscara...

Xuño con actividades do Apego en Compostela

Paseniño van volvendo as actividades do Apego... Seguro que algunha vez vos tedes preguntado onde vivirá o polbiño Po. E se cadra pensastes que como é un polbo vive no mar, non si?

Máis "De como se chaman"

Nomear os alimentos é algo que comezan a facer ben cediño... Velaquí unha selección de todas esas cousas que axiña van ter o pracer de degustar: iogur, pexego, amorodo, cabaciño, zume, cereixa…

Recursos do Apego para os días na casa

Estes días que estamos na casa son unha oportunidade de coñecer e profundar sobre os recursos que tedes na páxina do Apego... Temos unha escolma de arrolos, recitados e xogos para as familias que están esperando a chegada do bebé, pero tamén para as familias que teñen nenas e nenos pequenos. Cada día podedes escoller un arrolo, un recitado ou un xogo diferente e descubrir se hai algún que non coñeciades! Na mesma páxina tedes clips de audio para escoitar as melodías. Seguro que atoparedes variacións entre as coplas que vós coñecedes e as que están na páxina, porque hai mil posibilidades e palabras! Hai unha sección cos vídeos de Po, entre outros, onde podedes aprender desde as cores e as froitas ata as partes do corpo a través dun xogo, ou mesmo a canción do aniversario. En Palabras para medrar atoparedes vocabulario escollido relacionado coa crianza, co proceso de medrar e con glosario para o día a día que seguro que atopades de interese. Estes días para pasar en casa esta sección pode ser moi interesante para chamar ás cousas polo seu nome, para contar contos e entender un pouco mellor o mundo que nos rodea... que saímos polo “embigo”, se o día está “solleiro” ou “nubrado”, as novas que poñen no “xornal” e moito máis! Inda non é momento de xuntarnos coas amizades, pero ben podemos aproveitar para ver os descargables da sección de Modelos de convite, onde tedes uns recursos tanto para descargar como para copiar o texto que sempre dá preguiza escribir, e aquí podedes copialo directamente para preparar as festas que poderemos facer cando o virus marche! Para nais, pais e demais familia tedes unha sección moi especial onde tedes información moi, moi interesante sobre a crianza, onde por exemplo comentamos puntos a ter en conta para tomar decisións importantes, como a escolla do nome, o idioma que lle imos falar ou quen vai coller o permiso. Tamén tedes indicacións sobre o desenvolvemento motor para saber un pouco mellor que tempo teñen os e as nenas no seu crecemento ou algúns consellos de crianza positiva. A sección de descargas tedes unha chea de material deseñado especialmente para o Apego, tendo en conta o que consideramos que podedes usar vós, as familias e as persoas involucradas na crianza dos e das nenas. Tarxetas de rutina, o menú semanal para organizarse mellor, material sobre o tempo cronolóxico e meteorolóxico ou a nosa última novidade! Os bits! Para rematar tedes unha chea de recursos a un clic, con ligazón a recursos externos do Apego de todo tipo: música, audiovisuais, contos etc. Esperamos que estes recursos vos fagan máis levadeira a estadía na casa.

De como se chaman!

No apartado de descargas desta páxina poderedes atopar unha boa listaxe de bits para aprender xogando os nomes das cousas do universo infantil e mais unha selección de animais cos que nos podemos atopar claquera día de paseo polo noso medio natural. Buscade en "De como se chaman".

Pontevedra acolle unha nova programación do Apego na primavera

PROGRAMA ADIADO POR MOR DA SITUACIÓN SANITARIA Coa chegada do Entroido a Pontevedra comezamos coas actividades do programa Apego para os meses de febreiro, marzo, abril, maio e xuño. Abrimos cunha actividade dirixida ao profesorado de educación infantil, "Alí", e continuamos con outra actividade de formación para as familias sobre a pedagoxía Pikler. Nesta edición Pontevedra aposta por unha programación que mesture a formación pedagóxica con obradoiros de recursos para as familias cos peques máis peques, con "Arrolos de salitre" e "Fíos do querer", e actividades ao aire libre para familias con nenas e nenos de 0 a 6 anos. Esta primavera sairemos ás rúas de Pontevedra a xogar e percorreremos as zonas naturais da contorna para exploralas e aprender máis sobre a súa fauna, en "Aprendendo a falar cos paxariños", e flora, en "Na procura das herbas de san Xoán". Podedes descargar aquí o programa completo! Vémonos no Apego!