Na Biblioteca municipal de Lugo e no MIHL porémoslle boa cara a este frío inverno cunhas xornadas de animación á lectura e de contacontos para os máis novos da casa durante os meses de febreiro e marzo.
O Concello de Lugo segue a apostar por fomentar a lectura e o amor polos libros a través de contacontos e de espectáculos musicais. As sesións están destinadas a un público especial de 0 a 6 anos. As entradas son de balde, pero dado que a capacidade é limitada é necesario retirar as invitacións a partir das 10:30 horas do luns da semana da actuación correspondente. Todas as sesións comezarán ás 18:30 horas.
O sábado, 17 de febreiro, no MIHL contaremos con Paco Nogueiras, quen nos presentará o seu novo espectáculo musical “Radio Bule Bule” (para un público de máis de tres anos).
O xoves, 22 de febreiro, na Biblioteca Municipal estará Caxoto Contacontos, que nos representará “Un libro baixo a almofada” (a partir de catro anos).
O 1 de marzo, xoves, na Biblioteca Municipal teremos a Pavís Pavós con “Contos para bebés” (de 0 a 3 anos).
O sábado, 17 de marzo, estará no MIHL Migallas Teatro combinando música e teatro co espectáculo “Canta connosco” (a partir de tres anos).
O xoves, 22 de marzo, na Biblioteca Municipal contaremos con Tarabelos que nos representará “Debulendo lendas …galegas” (a partir de cinco anos).
A programación completa recóllese no pdf adxunto.