A música, a lingua e a afectividade son o eixe desta experiencia, enriquecedora tanto para as crianzas como para as persoas adultas, que están a compartir 12 familias de Moaña, con crianzas de 3 meses a 3 anos, neste obradoiro musical de 10 sesións. Desenvólvese nas instalacións da Escola de Música Municipal de Moaña e impárteo unha das súas profesoras. Con cancións, recitados e xogos musicais axeitados para esta etapa da vida, buscamos a estimulación das nenas e dos nenos e o desenvolvemento da súa musicalidade, así coma o seu desenvolvemento integral. Coa axuda de diferentes obxectos, enriquecemos e apoiamos a experiencia musical, favorecendo tamén a relación coa familia e co grupo. Con actividades dinámicas e estimulantes, reforzamos lazos que xeren apego nas familias.
Un equipo do programa da TVG Fun polo aire veu gravar unha destas sesións, que podedes visualizar premendo aquí.